ބައިނަލް އަޤްވާމީ ހަކުރުބަލީގެ ދުވަހުގެ މުނާޞަބާގައި ހަކުރުބައްޔަށް ޓެސްޓްކޮށްދިނުމާއި ލޭ ހަދިޔާކުރުމުގެ ހަރަކާތެއް ސީއެސްޓީއައިގައި ފަށައިފިއެވެ.

މިއަދު ސިވިލްސަރވިސް ޓްރެއިނިނގް އިންސްޓިޓިއުޓް (ސީއެސްޓީއައި)ގައި ފެށުނު މި ހަރަކާތަކީ ސީއެސްޓީއައިގައި ކިޔަވަމުންދާ ދަރިވަރުން އިސްނަގައިގެން ކޮންމެ އަހަރަކު ކުރިޔަށްގެންދާ އިޖްތތިމާއީ ހަރަކާތްތަކުގެ ތެރޭގައި ހިމެނޭ ހަރަކާތެކެވެ. މިގޮތުން ލޭ ހަދިޔާކުރުމުގެ މިހަރަކާތަކީ މޯލްޑިވްސް ބްލަޑް ސަރވިސަސްއާ ގުޅިގެން ތެލެސީމިއާ ކުދިންނަށް ބޭނުންވާ ލޭ ހޯދުމަށް އެހީތެރިވެދިނުމުގެ މަޤްޞަދުގައި ހަރަކާތެކެވެ. އަދި މި ހަރަކާތްބާއްވާ މި ދުވަހަކީ ދުނިޔޭގެ ހަކުރުބަލީގެ ދުވަސްކަމުން ދަމަނަ ވެއްޓާ ގުޅިގެން ހަކުރުބައްޔަށް ހިލޭ ޓެސްޓްކޮށްދިނުމާއި ހަކުރުބައްޔާގުޅޭ މައުލޫމާތު ދިނުމުގެ ކަންކަންވެސް މިހަރަކާތުގެ ތެރޭގައި ކުރިޔަށްދެއެވެ. ލޭ ހަދިޔާކުރުމާއި ހަކުރުބައްޔަށް ޓެސްޓްކޮށްދިނުމުގެ މި ހަރަކާތަކީ އާންމުކޮށް ހުޅުވާލައިގެން ކޮންމެ މީހަކަށްވެސް ބައިވެރިވެވޭގޮތަށް ކުރިޔަށްގެންދެވޭ ހަރަކާތެކެވެ. މި ހަރަކާތް މިއަދު ހެނދުނު 10 އިން މެންދުރުފަހު 2 އަށް ކުރިޔަށްދާނެއެވެ. އަދި މިހަރަކާތް ނިންމުމުގެ ރަސްމިއްޔާތުގައި ރާއްޖޭގެ ބައެއް މަޝްހޫރު އެތްލީޓުންކަމުގައިވާ ސާޢިދު އަދި ފަޒީލް ބައިވެރިވާނެއެވެ.