ބައިނަލް އަޤްވާމީގޮތުން ފާހަގަކުރާ، އަންހެނުންނާ ދެކޮޅަށް ކުރާ އަނިޔާ ހުއްޓުމުގެ ދުވަހުގެ މުނާޞަބާ ފާހަގަކުރުމަށް ސިވިލް ސަރވިސް ކޮމިޝަނުގައި މިކަމަށް ހޭލުންތެރިކަން އިތުރުކުރުމުގެ ސެޝަނެއް މިއަދު ބާއްވައިފިއެވެ. ކޮމިޝަނުގެ ސްޓާފުންނަށް މިއަދު ބޭއްވި މި ސެޝަން ނަންގަވައިދެއްވީ ހިލޭ ސާބަހަށް މަސައްކަތްކުރާ ޖަމިއްޔާއެއްކަމަށްވާ ވިމެން އެންޑް ޑިމޮކްރަސީގެ ނައިބުރައީސާ ޢާއިޝަތު ޝީޒާއެވެ. މި ސެޝަނުގައި، އަންހެނުންނަށް ކުރާ އަނިޔާއާ އަދި އޮފީސް މާހައުލުގައި އަންހެނުން ކުރާ އެކިބާވަތުގެ އަނިޔާ، ފުރައްސާރަ އަދި ގޯނާތަކާއި، އަންހެނަކަށް ވީތީ ކުރެވޭ ތަފާތުކުރުންތަކާ ބެހޭގޮތުން ޝީޒާ މައުލޫމާތުދެއްވިއެވެ. އަދި މިފަދަ ގޯނާތަކާއި ފުރައްސާރަތައް ހުއްޓުވުމަށް ކުރެވިދާނެ ކަންކަމާއި އެޅިދާނެ ފިޔަވަޅުތަކާއި އަދި މި ފަދަ އަމަލުތައް ރިޕޯޓްކުރުމުގައި އަމަލުކުރަންވީ ގޮތްތަކާބެހޭ މައުލޫމާތު ސީޒާގެ ޕްރެޒެންޓޭޝަނުގައި ދެއްވިއެވެ.

މިއަދު ކޮމިޝަނުގައި ބޭއްވި މި ހަރަކާތުގައި ކޮމިޝަނުންގެ ރައީސް ޑރ. ޢަލީ ޝަމީމު ވާހަކަ ދައްކަވަމުން ވިދާޅުވީ އަންހެނުންނަށް ކުރާ އަނިޔާތައް ހުއްޓުވުމަށް ބައިނަލް އަޤްވާމީ ގޮތުން ހަރަކާތްތައް ފެށިގެން އައިގޮތުގެ މައްޗަށް ތާރީޚީ ނަޒަރަކުން ބައްލަވާލައްވައި މައުލޫމާތު ޙިއްސާކުރެއްވިއެވެ. ބައިނަލްޢަޤްވާމީ ގޮތުން ފާހަގަކުރެވޭ މި ދުވަހުގެ މުނާޞަބާ ފަހަގަކުރުމަށް މިއަދު ބޭއްވި މި ހަރަކާތުގައި ކޮމިޝަނުގެ ގިނަ ޢަދަދެއްގެ ސްޓާފުން ބައިވެރިވެފައިވާއިރު މިދުވަހުގެ މުނާޞަބާ ފާހަގަކުރުމަށް މިއަދު ގިނަ ސްޓާފުން އޮފީހަށް ހާޞިރުވީވެސް އޮރެންޖް ކުލައިގެ ހެދުމުގައެވެ.