ތަރައްޤީ އަށް އެހީތެރިވެދޭ ޖަޕާނުގެ އިދާރާކަމުގައިވާ ޖަޕާން އިންޓަރނޭޝަނަލް ކޯރޕަރޭޝަން އެޖެންސީ (ޖައިކާ) ގެ ވަފުދެއް މިއަދު ކޮމިޝަނަށް ޒިޔާރަތްކުރައްވައި ދިވެހިރާއްޖެއަށް މާސްޓާރސް ފެންވަރުގެ ސްކޯލަރޝިޕް ލިބިދިނުމާ ގުޅޭގޮތުން މަޝްވަރާ ކުރައްވަވައިފިއެވެ. މިއަދު ބޭއްވުނު މަޝްވަރާ ބައްދަލުވުމުގައި ދިވެހި ސިވިލް ސަރވިސްގެ މުވައްޒަފުންގެ ހުނަރާއި ގާބިލުކަން އިތުރުކުރުމަށް އެހީވެދިނުމުގެ ގޮތުން ޖައިކާ އިން މާސްޓާރސް އަށް ކިޔެވުމަށް ކުރިއަށް އޮތް 5 އަހަރު، 2021 ވަނަ އަހަރުން ފެށިގެން ކޮންމެ އަހަރަކު 6 ސްކޯލަރޝިޕް ދިވެހިރާއްޖެއަށް ދެއްވުމަށް ވަނީ ހަމަޖެހިފައިކަމުގައި ޖައިކާ އިން ދެންނެވިއެވެ.
މި ބައްދަލުކުރެއްވުމުގައި ޖައިކާ ގެ ފަރާތުން އިސްކޮށް އިންނެވީ އެ އެޖެންސީގެ މެނޭޖިންގ ޑިރެކްޓަރ މިސްޓަރ ޝިޔޯނޯޔަ އެވެ. ކޮމިޝަނުގެ ފަރާތުން އިންނެވީ ކޮމިޝަނުގެ ރައީސް ޑރ. އަލީ ޝަމީމެވެ.