މި ޖުލައި މަހުގެ 22 އިން އޯގަސްޓު 11 އަށް ޗައިނާގެ ނަންޗެންގް ސިޓީ ގައި ކުރިއަށް ގެންދާ "ސެމިނަރ އޮފް ޕަބްލިކް މެނޭޖްމަންޓް ފޯރ ސިވިލް ސަރވަންޓްސް އޮފް މޯލްޑިވްސް" ގައި ބައިވެރިވާ ދިވެހި ސިވިލް ސަރވިސްގެ 30 މުވައްޒަފުން އިދާރީ ހިންގުމާގުޅޭ ގޮތުން ޗައިނާގެ ތަޖުރިބާ ހާސިލުކޮށް މިކަމުގައި ކުރިއަރާފައިވާ ޒަމާނީ ގޮތްތަކުގެ ތަމްރީނު ހޯދަމުން އެބަގެންދެއެވެ. ޗައިނާގައި ސިވިލް ސަރވިސްގެ މުވައްޒަފުން ތަމްރީނުކޮށް ކުރިއެރުވުމަށް މަސައްކަތްކުރާ ޖިއަންޒީ ކޮލެޖް އޮފް ފޮރިން ސްޓަޑީސްގެ ފަރާތުން އިންތިޒާމުކޮށް ކުރިޔަށްގެންދާ މި ތަމްރީނުތަކުގެ މަޢުލޫމާތާއި ތަޖުރިބާ ހިއްސާކުރުމުގެ ސެޝަންތައް މިހާރު ދަނީ ކުރިއަށްގެންދެމުންނެވެ. ހުރިހާ ޚަރަދެއް ޗައިނާގެ ސަރުކާރުން ދެއްވަވައިގެން ކުރިޔަށްގެންދެވޭ މި ތަމްރީނުތަކުން ވަރަށް ފުރިހަމަ މަޢުލޫމާތުތަކެއް ލިބި މަސައްކަތުގެ ޤާބިލުކަން އިތުރުވެގެންދާ ކަމުގައި ބައިވެރިންގެ ފަރާތުން ވަނީ މަޢުލޫމާތު ލިބިފައިވެއެވެ.
އަދި އޭގެ އިތުރުން މި ޒިޔާރަތުގައި ޗައިނާގެ އިގްތިސާދީ ކުރިއެރުން އަދި މުއްސަނދި އުމްރާނީ ތަރައްޤީ އަމިއްލައަށް ތަޖުރިބާކޮށްލުމުގެ ގޮތުން ބައިވެރިންނަށް ޗައިނާގެ މަޝްހޫރު ސިޓީތަކަށާއި ބިނާތަކަށް ޒިޔާރަތްކޮށްލުމުގެ ފުރުސަތުވެސް ވަނީ ފަހިކޮށްދީފައެވެ.