މިނިސްޓްރީ އޮފް ޓޫރިޒަމް ގެ ޕަރމަނަންޓް ސެކްރެޓަރީކަމުގެ މަޤާމަށް އަލްފާޟިލާ އައިޝަތު ސޫޒަން ހަނީފް މިއަދު ސިވިލް ސަރވިސް ކޮމިޝަނުން އައްޔަންކޮށްފިއެވެ. އަލްފާޟިލާ އައިޝަތު ސޫޒަން ޕަރމަނަންޓް ސެކްރެޓަރީގެ މަޤާމަށް އައްޔަންކުރެއްވެވީ، މިކަމަށް މިއަދު ޓޫރިޒަމް މިނިސްޓްރީގައި ބޭއްވުނު ރަސްމިއްޔާތެއްގައި ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމެވެ. މި ރަސްމިއްޔާތު ޝަރަފްވެރިކޮށްދެއްވެވީ މިނިސްޓަރ އޮފް ޓޫރިޒަމް އޮނަރަބަލް އަލްފާޟިލް ޢަލީ ވަހީދެވެ.
އަލްފާޟިލް އާއިޝަތު ސޫޒަން އަކީ އޮސްޓްރޭލިއާގެ ޔުނިވަރސިތީ އޮފް ސަދާން ކުއީންސްލޭންޑް އިން މާސްޓާރސް އޮފް ބިޒްނަސް އެޑްމިނިސްޓްރޭޝަން ޙާސިލްކުރައްވަވައި އަދި ޔުނިވަރސިޓީ އޮފް އީސްޓް ލަންޑަން އިން ބިޒްނަސް އެޑްމިނިސްޓްރޭޝަންގެ ދާއިރާއިން ބެޗްލަރ އޮފް އާރޓްސް ހާސިލް ކުރައްވަވާފައިވާ ބޭފުޅެކެވެ. ގިނަދުވަހު ކުރިން މަސައްކަތް ކުރައްވަވާފައިވަނީ ވެރިންގެ ފެންވަރުގައި މޯލްޑިވިސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީގައެވެ. މިގޮތުން 10 އަހަރަށްވުރެ ގިނަ ދުވަހު މަސައްކަތު ތަޖްރިބާ ހާޞިލް ކުރައްވަވާފައިވެއެވެ.