ނެޝަނަލް ސެންޓަރ ފޯރ ގުޑް ގަވަރނަންސް (އެން.ސީ.ޖީ.ޖީ) ގެ ދެބޭފުޅުންގެ ވަފުދެއް މިއަދު ހަވީރު ރާއްޖެއަށް ވަޑައިގަންނަވައިފިއެވެ. މި ދެ ބޭފުޅުންނަށް ވެލާނާ އިންޓަރނޭޝަނަލް އެއާރޕޯރޓް އިން އިސްތިޤްބާލު ކުރައްވަވައި މަރުޙަބާ ވިދާޅުވީ ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމް އެވެ. މި އޮގަސްޓު މަހުގެ  18އިން 20 އަށް ރާއްޖެއަށް ކުރައްވަވާ މި ދަތުރުފުޅަކީ އިންޑިއާގެ ބޮޑު ވަޒީރު ހިޒް އެކްސަލަންސީ ނަރެންދްރަ މޯދީ ދިވެހިރާއްޖެއަށް ކުރެއްވި ފުރަމާނަ ދަތުރުފުޅުގައި ސިވިލް ސަރވިސް ކޮމިޝަނާއި ނޭޝަނަލް ސެންޓަރ ފޯރ ގުޑް ގަވަރނަންސް (އެން.އެސް.ޖީ.ޖީ) އާ އެކު ސޮއިކުރެވުނު ފަހުމުނާމާއާ ގުޅޭ ރަސްމީ މަޝްވަރާތައްކުރެއްވުމަށެވެ.އެން.ސީ.ޖީ.ޖީ އަކީ އިންޑިއާގެ އިސް މަޤާމުތަކުގައި މަސައްކަތްކުރާ ސިވިލް ސަރވަންޓުން ތާޒާކޮށް މަސައްކަތުގެ ޤާބިލުކަން އިތުރުކުރުމަށް ފުޅާދާއިރާގައި ތަމްރީނު ހިންގާ މަރުކަޒެވެ.
އެން.ސީ.ޖީ.ޖީ ގެ ފަރާތުން މިއަދު ރާއްޖެއަށް ވަޑައިގެންނެވި ދެ ބޭފުޅުންނަކީ ޑިޕާރޓްމަންޓް އޮފް އެޑްމިނިސްޓްރޭޓިވް ރިފޯރމްސް އެންޑް ޕަބްލިކް ގްރީވެންސަސް ގެ އެޑިޝަނަލް ސެކްރެޓަރީ، ޝްރީ ވީ. ސްރީނިވަސް އާއި އެން.ސީ.ޖީ.ޖީ ގެ އެސޯސިއޭޓް ޕްރޮފެސަރ ޕޫނަމް ސިންގް އެވެ. މި ދަތުރުފުޅުގައި މި ބޭފުޅުން ރައީސުލްޖުމްހުރިއްޔާގެ ނައިބުގެ އަރިހަށް އިޙްތިރާމުގެ ޒިޔާރަތެއްކުރައްވަން ވަނީ ހަމަޖެހިފައިއެވެ. އަދި  ސިވިލް ސަރވިސް ޓްރެއިނިންގ އިންސްޓިޓިއުޓް ގައި ޕަރމަނަންޓް ސެކްރެޓަރީންނަށާއި ސިވިލް ސަރވިސް ގެ އެކި އިދާރާތަކުގެ އިސްވެރިންނަށް ލެކްޗަރ އެއް ދިނުމަށް ވެސް ވަނީ ހަމަޖެހިފައެވެ.