މިނިސްޓްރީ އޮފް އެޑިޔުކޭޝަނަށް ދިމާވެފައިވާ އިދާރީ ދަތިތަކާ އަދި މުވައްޒަފުންނަށް ޓްރެއިނިންގ ދިނުމާއި ގުޅޭގޮތުން މިއަދު ސިވިލް ސަރވިސް ކޮމިޝަނުގެ މެންބަރުންނާ ބައްދަލުކޮށް މަޝްވަރާކުރައްވައިފިއެވެ. މި ބައްދަލުވުމުގައި މިނިސްޓްރީ އޮފް އެޑިޔުކޭޝަނުގެ ފަރާތުން އިސްކޮށް ބައިވެރިވެވަޑައިގެންނެވީ މިނިސްޓްރީ އޮފް އެޑިޔުކޭޝަންގެ ޕަރމަނަންޓް ސެކްރެޓަރީ އަލްފާޟިލް އަހުމަދު ޢަލީ އެވެ. ކޮމިޝަނުގެ ފަރާތުން އިސްކޮށް މި ބައްދަލުވުމުގައި ބައިވެރިވެވަޑައިގެންނެވީ ކޮމިޝަނުގެ ރައީސް ޑރ. އަލީ ޝަމީމްގެ އިތުރުން ކޮމިޝަނުގެ ނައިބު ރައީސް އަލްފާޟިލް ޝަހީދު މުޙައްމަދު އަދި ކޮމިޝަނުގެ މެމްބަރ އަލްފާޟިލާ ފާތިމަތު އާމިރާ އެވެ. މި މައްސަލަތައް ހައްލުކުރުމަށް ފުރިހަމަ އެއްބާރުލުމާއި އެހީތެރިކަން ދެއްވާނެކަމަށް ކޮމިޝަނުގެ ރައީސް ދެންނެވިއެވެ. އަދި މިގޮތުން އެޑިއުކޭޝަން މިނިސްޓްރީ އާއި އެކު ކޮމިޝަނުން ސިލްސިލާ ބައްދަލުވުންތަކެއް ބޭއްވުމަށް ދެ ފަރާތުން އެއްބަސްވެވުނެވެ.