މި ސެޕްޓެންބަރު 16 އިން 28 އަށް އިންޑިއާގެ ސެންޓަރ ފޯރ ގުޑް ގަވަރނަންސް ގެ ފަރާތުން ދިވެހި ސިވިލް ސަރވިސްގެ 29 މުވައްޒަފަކަށް ކުރިއަށްގެންދާ ސިވިލް ސަރވިސް ޒަމާނީކޮށް ހިންގުން ހަރުދަނާކުރުމާބެހޭ ތަމްރީނު ޕްރޮގްރާމް ކުރިއަށްދާނުދާގޮތް ބައްލަވާލެއްވުމަށް މި ތަމްރީނުގައި ބައިވެރިވެވަޑައިގެންފިއެވެ. މިގޮތުން ގިންތީގެ ހަމަހަމަކަމާއި، ނޮލެޖް މެނޭޖްމަންޓް އަދި އިންޑިއާގެ އީ ގަވަރނަންސް އިނިޝިއޭޓް އާއި ދެހެރެދުން ސުމާރޓް ސިޓީ އާ ގުޅޭގޮތުން ބޭއްވުނު ސެޝަންތަކުގައި ބައިވެރިވެވަޑައިގެންނެވިއެވެ.
އިއްޔެ (22 ސެޕްޓެންބަރު) ކޮމިޝަނުގެ ރައީސް ޑރ. އަލީ ޝަމީމް އެން.ސީ.ޖީ.ޖީ އަށް ޒިޔާރަތްކުރެއްވުމުން ހޫނު މަރުޙަބާއެއް އެމަރުކަޒުން އެރުވިއެވެ. އަދި ސެޝަންތަކުގެ ތެރޭގައި އެން.ސީ.ޖީ.ޖީ އާއި ސިވިލް ސަރވިސް ކޮމިޝަނާ ދެމެދު ހަދިޔާ ބަދަލުކުރުން ބޭއްވުނެވެ. ސިވިލް ސަރވަންޓުންނަށް އިންޑިއާގެ ހިލޭ އެހީގައިކުރިއަށްގެންދެވޭ ތަމްރީނު ޕްރޮގްރާމް ވަނީ ވަރަށް ރަނގަޅު މަޢުލޫމާތާއި އިންޑިއާގެ ތަޖްރިބާ ސިވިލް ސަރވިސްގެ ކަންކަމާއި ސަރުކާރު ހިންގުމުގައި ހިއްސާކޮށްދެވޭ ގޮތައް ފަރުމާކޮށްފައެވެ. މިގޮތުން ތަމްރީނާއި ތަޖްރިބާ ބަދަލުކުރުމަށް ބޭނުންވާ މައުޟޫއުތައް ވަނީ އެން.ސީ.ޖީ.ޖީ އާއި ސީ.އެސް.ސީ އާ ދެމެދު މާލޭގައި މަޝްވަރާކޮށް ކަނޑައަޅާފައެވެ.
އިންޑިއާގެ 2 ސިޓީ އެއްކަމުގައިވާ މުސޫރީ އާއި ނިއު ދިއްލީގައި ކުރިއަށްގެންދެވޭ މި ތަމްރީނު ޕްރޮގްރާމްގައި ތަޖްރިބާ ހޯދޭގޮތަށް ތަންތަނަށް ޒިޔާރަތްކުރުންވެސް ހަމަޖެހިފައިވެއެވެ. އަދި ދެ ޤައުމުގެ ޡަޤާފީ ހަރަކާތްތައް ދައްކުވާދޭ ޝޯ އެއްވެސް ވަނީ ބޭއްވިފައެވެ. މި ޕްރޮގްރާމްގެ ތެރޭގައި ތާޖްމަހަލް އަށް ޒިޔާރަތްކުރުންވެސް ހިމެނިފައިވެއެވެ.