މި މަހުގެ 16 އިން 28 އަށް އިންޑިއާގެ އެން.ސީ.ޖީ.ޖީ ގައި ކުރިއަށް ގެންދާ "ޓްރެއިނިންގް ޕްރޮގްރާމް އިން ފީލްޑް އެޑްމިނިސްޓްރޭޝަން ފޯރ ސިވިލް ސަރވަންޓްސް އޮފް މޯލްޑިވިސް" ގައި ބައިވެރިވާ ދިވެހި ސިވިލް ސަރވިސްގެ މުވައްޒަފުން އިދާރީ ހިންގުމާގުޅޭ ގޮތުން އިންޑިއާގެ ތަޖުރިބާ ހާސިލުކޮށް މިކަމުގައި ކުރިއަރާފައިވާ ޒަމާނީ ގޮތްތަކުގެ ތަމްރީނު ހޯދަމުން އެބަގެންދެއެވެ. އިންޑިއާގެ ސިވިލް ސަރވިސްގެ މުވައްޒަފުން ތަމްރީނުކޮށް ކުރިއެރުވުމަށް މަސައްކަތްކުރާ ނެޝަނަލް ސެންޓަރ ފޯރ ގުޑް ގަވަރނަންސް (އެން.ސީ.ޖީ.ޖީ) ގެ ފަރާތުން އިންތިޒާމުކޮށް ކުރިޔަށްގެންދާ މި ތަމްރީނުތަކުގެ މަޢުލޫމާތާއި ތަޖުރިބާ ހިއްސާކުރުމުގެ ސެޝަންތައް މިހާރު ދަނީ ކުރިއަށްގެންދެމުންނެވެ.
އެގޮތުން ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމް ވަނީ މިހާރު އިންޑިއާގައި ތަމްރީނު ހާސިލް ކުރަމުން ގެންދާ ދިވެހި ސިވިލް ސަރވިސް ގެ މުވައްޒަފުންނާއެކު ތަމްރީނުގައި ބައިވެރިވެވަޑައިގެންފައެވެ. އެގޮތުން މި ސެޕްޓެންބަރު 20 އިން 28 އަށް އިންޑިއާގެ ނިއު ދިއްލީގެ އިސް މުއައްސަސާތަކަށާއި އެ މުއައްސަސާތަކުގެ ވެރިންނާއި ބައްދަލުކުރައްވަންވަނީ ހަމަޖެހިފައެވެ. މި ވަފުދާއެކު އިންޑިއާ އަށް ވަޑައިގެންނެވި ކޮމިޝަނުގެ މެންބަރު އަލްފާޟިލާ ފާތިމަތު އާމިރާ ވަނީ މިއަދު މެންދުރު މާލެ އަށް ވަޑައިގަންނަވާފައެވެ.