އިންޑިއާގައި މުވައްޒަފުންނަށް ތަމްރީނުދީ، ޤާބިލްކަން އުފެއްދުމަށް މަސައްކަތްކުރާ މުއައްސަސާ ކަމުގައިވާ ނެޝަނަލް ސެންޓަރ ފޯރ ގުޑް ގަވަރަނަންސް (އެން.ސީ.ޖީ.ޖީ) އިން ކުރިއަށްގެންދެވުނު 2 ހަފްތާގެ ތަމްރީނު ޕްރޮގްރާމް ދިވެހި ސިވިލް ސަރވިސްގެ 30 ބައިވެރިން ފުރިހަމަކުރައްވައިފިއެވެ. ނޮވެންބަރު މަހުގެ 18 އިން 30 އަށް އިންޑިއާގެ ނިއު ދިއްލީ އަދި މަސޫރީ ގައި ބޭއްވުނު ސަރުކާރުގެ އިދާރީ ހިންގުމާއިބެހޭ މި ސެމިނަރގައި ސިވިލް ސަރވިސްގެ އެކި އެކި އިދާރާތަކުން ހޮވާލެވުނު 30 މުވައްޒަފުން ވަނީ ބައިވެރިވެވަޑައިގެންފައެވެ.
"ޓްރެއިނިންގ ޕްރޮގްރާމް އިން ފީލްޑް އެޑްމިނިސްޓްރޭޝަން" ގެ ނަމުގައި ކުރިއަށް ގެންދެވުނު މި ތަމްރީނަކީ ދިވެހި ސިވިލް ސަރވިސްގެ މުވައްޒަފުންގެ ހުނަރާއި ޤާބިލުކަން އިތުރުކޮށް އަދި ސިވިލް ސަރވިސްގެ ދާއިރާގައި އިންޑިއާގެ ތަޖްރިބާ ހިއްސާކުރުމުގެ ގޮތުން ބޭއްވުނު 2 ހަފްތާގެ ތަމްރީނެކެވެ. މި ތަމްރީނަކީ ދާދިފަހުން އިންޑިއާގެ ބޮޑުވަޒީރު ހިޒް އެކްސަލަންސީ މިސްޓަރ ނަރެންދަރު މޯދީ ރާއްޖެއަށް ކުރެއްވެވި ފުރަމާނަ ދަތުރުފުޅުގައި އިންޑިއާގެ ސެންޓަރ ފޯރ ގުޑް ގަވަރނަންސް އާއި ސިވިލް ސަރވިސް ކޮމިޝަނާއި ދެމެދު ސޮއިކުރެވުނު ފަހުމުނާމާގެ ދަށުން އިންތިޒާމުކުރެވުނު ދެވަނަ ތަމްރީނު ބުރެވެ.