ދިވެހި ސިވިލް ސަރވިސް ގެ މުވައްޒަފުންގެ ހިންގުމުގެ ގާބިލުކަން އިތުރުކޮށް މަސައްކަތުގެ ހުނަރު ތާޒާކޮށްދިނުމަށް ޓަކައި ތަފާތު ތަމްރީނު ފޯރުކޮށްދީ ދެ މުއައްސަސާގެ ދެމެދުގައި ސިވިލް ސަރވިސް ގެ ކަންކަން ޒަމާނީކޮށް ކުރިއެރުވުމުގައި އެއްބާރުލުން ދިނުމުގެ މަގްސަދުގައި އިންޑިއާގެ ހައިދަރުއާބާދުގައި ހުންނަ އެޑްމިނިސްޓްރޭޓިވް ސްޓާފް ކޮލެޖް (އާސްކީ) އާއި ސިވިލް ސަރވިސް ކޮމިޝަނާ ދެމެދު 2014 ވަނަ އަހަރުން ފެށިގެން ގާއިމުކުރެވިފައިވާ ފަހުމުނާމާއަށް ދުވަސް ހަމަވެފައިވާތީ މިއަދު އަލުން ފަހުމުނާމާ އާކުރެވިއްޖެއެވެ.
މިގޮތުން ފަހުމުނާމާ އާކުރުމުގެ އެއްބަސްުވުމުގައި ސޮއި ކުރުމުގެ ރަސްމިއްޔާތު ބޭއްވިފައިވަނީ އާސްކީ ގެ މައި މަރުކަޒުގައެވެ. ސިވިލް ސަރވިސް ކޮމިޝަނުގެ ފަރާތުން ފަހުމުނާމާ އާކުރުމުގެ ލިއުމުގައި ސޮއިކުރެއްވީ މިކަމަށްޓަކައި ހައިދަރުއާބާދަށް ވަޑައިގެން ހުންނެވި ކޮމިޝަނުގެ މެންބަރު އަލްއުސްތާޛް ޒަކަރިއްޔާ ހުސައިން އެވެ.
މިއަދު ބޭއްވުނު ސޮއިކުރުމާއެކު ދެފަރާތުގެ ދެމެދުގައި ގާއިމުކުރެވިފައިވާ ފަހުމުނާމާގެ މުއްދަތު މިއަދުން ފެށިގެން އިތުރު 3 އަހަރަށް އައުކުރެވުނީއެވެ.
އާސްކީ އަކީ ޕަބްލިކް އެޑްމިނިސްޓްރޭޝަނާއި މެނޭޖްމަންޓްގެ ދާއިރާގެ އިތުރުން އައިސީޓީ އާއި އެހެނިހެންވެސް ފަންނީ ދާއިރާތަކުން ދިގުމުއްދަތާއި ކުރުމުއްދަތުގެ ކޯސްތައް ރާވައި ހިންގާ މަރުކަޒެކެވެ. ދިވެހި ސިވިލް ސަރވަންޓުންވެސް އަދި ކޮމިޝަނުގެ މުވައްޒަފުންގެވެސް މިފަދަ ތަމްރީނު ޕްރޮގްރާމްތަކުގައި ބައިވެރިވެފައިވެއެވެ. އަދި މިއަދު އާކުރެވުނު ފަހުމުނާމާއެކު އިތުރު ތަމްރީނުތަކުގެ ފުރުސަތު ފަހިވެގެންދާނެކަމާމެދު އުއްމީދުކުރެވެއެވެ.