މި މަހުގެ 6 އިން 13 އަށް އިންޑިއާގެ އެން.ސީ.ޖީ.ޖީ ގައި ކުރިއަށް ގެންދާ "ޓްރެއިނިންގް ޕްރޮގްރާމް ފޯރ ޕަރމަނަންޓް ސެކްރެޓަރީސް އެންޑް ސެކެޓްރީ ޖެނެރަލްސް އޮފް މޯލްޑިވިސް" ގެ ބައިވެރިން އިންޑިއާގެ ސިވިލް ސަރވަންޓުން ތަމްރީނުކުރާ މައި މަރުކަޒު ކަމުގައިވާ ލާލް ބަހާދުރް ޝާސްތްރީ ނެޝަނަލް އެކަޑަމީ އަށް ޒިޔާރަތްކުރައްވައިފިއެވެ. އެ އެކަޑަމީގެ ފަރާތުން ދިވެހި ސިވިލް ސަރވަންޓުންގެ ވަފުދައް މަރުހަބާ ދެންނެވީ ހެޑް އޮފް އެކަޑަމީ ޑރ. ސަންޖީވް ކަޕޫރް އެވެ.
މި ބައްދަލުވުމުގައި އިންޑިއާގެ ސިވިލް ސަރވިސް ގެ ރެކްރޫޓްމަންޓް އަދި ޕްރޮމޯޝަން ކުރިއަށް ގެންދެވޭ ގޮތްތަކާ ގުޅޭ ގޮތުން މަޝްވަރާކުރެވި މަޢުލޫމާތު ހިއްސާކުރެވުނެވެ. އަދި އަލަށް ދިވެހި ސިވިލް ސަރވިސް އަށް ވަންނަ މުވައްޒަފުންނަށް ތަމްރީނުކުރުމާއި ގުޅޭގޮތުން އެން.ސީ.ޖީ.ޖީ އާއި މަޝްވަރާކުރެވުނެވެ. މީގެ އިތުރުން މި ވަފުދުގެ ބައިވެރިން ވަނީ ލާލް ބަހާދުރް ޝާސްތްރީ ނެޝަނަލް އެކަޑަމީގެ ލައިބްރަރީ އާއި ސްޓޫޑެންޓް ރިސޯސަސް ސެންޓަރ ވެސް ބައްލަވާލައްވާފައެވެ.
ސަރުކާރުގެ ޕަރމަނަންޓް ސެކްރެޓަރީންނާއި އިސް ޒިންމާދާރުވެރިން ހިމެނޭ މި ވަފުދުގައި 14 ބޭފުޅުން ހިމެނިވަޑައިގަންނަވައެވެ. އޭގެ ތެރޭގައި ސިވިލް ސަރވިސް ކޮމިޝަނުގެ ޑިރެކްޓަރ ޖެނެރަލް އަލްފާޟިލް އަބްދުﷲ ސަޢީދު ވެސް ހިމެނިވަޑައިގަންނަވައެވެ.