ޕަކިސްތާނުގެ އިސްލާމްއާބާދު އާއި ލާހޯރުގައި ސިވިލް ސަރވަންޓުން ތަމްރީނުކުރާ މަރުކަޒު ނުވަތަ މުއައްސަސާ ތަކަށް ސިވިލް ސަރވިސް ކޮމިޝަނުގެ ވަފުދު މިހާރުކުރައްވަމުންގެންދަވާ ރަސްމީދަތުރުފުޅުގައި މިއަދު ކޮމިޝަނުގެ ވަފުދު ލާހޯރުގައި ހުންނަ ނެޝަނަލް އިންސްޓިޓިއުޓް އޮފް މެނޭޖްމަންޓް އާއެކު މަޝްވަރާކުރައްވައިފިއެވެ. މި މަޝްވަރާގެ ބޭނުމަކީ ދިވެހި ސިވިލް ސަރވަންޓުންނަށާއި ކޮމިޝަނުގެ މުވައްޒަފުންނަށް މަސައްކަތުގެ ގާބިލުކަން އިތުރުކުރުމުގެ ގޮތުން ތަމްރީނުވުމުގެ ފުރުސަތު ހޯދާދިނުމާގުޅޭ ގޮތުން މަޝްވަރާކުރުމެވެ.
އިއްޔެ ނިމްސް ގައި ބޭއްވުނު މަޝްވަރާ ބައްދަލުވުމުގައި ކޮމިޝަނުގެ ރައީސް ޑރ. އަލީ ޝަމީމާ މެންބަރު އަލްއުސްތާޛް ޒަކަރިއްޔާ ހުސެއިން އާއި ސިވިލް ސަރވިސް ޓްރެއިނިންގ އިންސްޓިޓިއުޓްގެ ޑިރެކްޓަރ ފާތްމަތް ހަބީބަ އާއި ކޮމިޝަނުގެ އިތުރު 2 ސްޓާފުން ބައިވެރިވެވާޑައިގެންނެވިއެވެ. ނެޝަނަލް އިންސްޓިޓިއުޓް އޮފް މެނޭޖްމަންޓް (ލާހޯރު) ގެ ފަރާތުން އިސްކޮށްބައިވެރިވެވަޑައިގެންނެވީ އެތާނގެ ޑިރެކްޓަރ ޖެނެރަލް މިސްޓަރ ރާމިޒް އަހްމަދާއި ޗީފް އިންސްޓްރަކްޓަރ ޑރ. ދާވޫދް މުހައްމަދު ބަރީޗް އެވެ.
މި ބައްދަލުވުމުގައި ނިމްސް އިން ކުރުމުއްދަތުގެ (3 މަސް) ތާޒާވުމުގެ ކޯސްތައް ހިންގޭގޮތާއި އެކޯސްތަކުގެ ޓީޗިންގ މެޓީރިއަލްސް ތައްޔާރުކުރެވޭގޮތާއި ދަރިވަރުންނަށް ކިޔަވާދެވޭ ގޮތާއި ކޯހުގައި ކިޔަވައިދޭ ކިޔަވައިދިނުން ދަސްކުރެވޭ މިންވަރު ބަލައި މާރކުސް ދެވޭގޮތާއި އަދިވެސް މި ކޯހާބެހޭގިނަ މަޢުލޫމާތްތަކެއް ކޮމިޝަނުގެ ވަފުދުގެ ބޭފުޅުންނާއި ހިއްސާކުރެއްވެވިއެވެ.