އައި.ޖީ.އެމް.އެޗް ގެ ތެރެއިން ދަރުމަވަންތަ ހޮސްޕިޓަލް ގެ ކޮމްޕްލެކްސް ގެ ޚިދްމަތްތައް މިހާރު ފަށާފައިވާއިރު، ދެތަނަށްބޭނުންވާ މުވައްޒަފުން ސިވިލް ސަރވިސްގެ ތެރެއިން ހަމަޖެއްސުމުގައި ދިމާވެފައިވާ ބައެއް ގޮންޖެހުންތައް ހައްލުކުރުމާގުޅޭގޮތުން ސިވިލް ސަރވިސް ކޮމިޝަނާއި އައި.ޖީ.އެމް.އެޗް އާ ދެމެދު ސިލްސިލާ މަޝްވަރާތަކެއް މިއަދު ފަށައިފިއެވެ. މި މަޝްވަރާތަކުގައި ކޮމިޝަނުގެ ފަރާތުން އިސްކޮށް ހުންނެވީ ކޮމިޝަނުގެ ރައީސް ޑރ. އަލީ ޝަމީމެވެ. އައި.ޖީ.އެމް.އެޗް ގެ ފަރާތުން އިސްކޮށް ހުންނެވީ އެ ހޮސްޕިޓަލްގެ ޗީފް އެގްޒެކެޓިވް އޮފިސަރ އިބްރާހިމް ސަލީމެވެ. ދެފަރާތުގެ ދެމެދުގައި ސިލްސިލާކޮށް ބައްދަލުވުންތައް ފެށުމުގެ މަޤްސަދަކީ އައި.ޖީ.އެމް.އެޗް އާއި ދަރުމަވަންތަ ހޮސްޕިޓަލް ކޮމްޕެލެކްސް އަށް ބޭނުންވާ ސިވިލް ސަރވަންޓުން ހަމަޖެއްސުމުގައި ދެފަރާތުން މަޝްވަރާކޮށް ހަލުވިކޮށް މުވައްޒަފުން ނެގޭނެ އިންތިޒާމެއް ހަމަޖެއްސުމާއި އަދި މިހާރު ތިބި މުވައްޒަފުންނަށް ދިމާވެފައިވާ ބައެއް ދަތިތައް ހައްލުކުރުމާ ގުޅޭގޮތުން މަޝްވަރާކުރުމެވެ.