މާލޭގައި ބިނާވެގެންވާ މިނިސްޓްރީތަކާއި އަދި ސިވިލް ސަރވިސްގެ ބޮޑެތި އިދާރާތަކުގައި އިންސާނީ ވަސީލަތް ރާވައި ބަލަހައްޓާ އިސްމުވައްޒަފުންނަށް ކޮމިޝަނުގެ ރައީސް ޑރ. އަލީ ޝަމީމް ޚާއްޞަ ތަމްރީނު ސެޝަނެއް ނަންގަވައިދެއްވައިފިއެވެ.

އިއްޔެ ސިވިލް ސަރވިސް ޓްރެއިނިންގ ސެންޓަރުގައި ބޭއްވުނު މިތަމްރީނު ސެޝަންގައި 74 މުވައްޒަފަކު ބައިވެރިވެފައިވެއެވެ. ކޮމިޝަނުގެ ރައީސް މިފަރާތްތަކަށް މަޢުލޫމާތްދެއްވާފައިވަނީ މުވައްޒަފުންގެ ކަންކަން ބެލެހެއްޓުމުގައި ސައިންޓިފިކް މެނޭޖްމަންޓް ބޭނުންކުރާނެގޮތާއި އަދި މި މަސައްކަތް ރަނގަޅު ފެންވަރެއްގައި މައްސަލަނުޖެހޭގޮތައް ބޭނުންކުރުމަށް ޢަމަލުކުރެވި ދާނެގޮތްތަކާއި އަދި ކަންކަން ފައްސިޔަކޮށް ގެންދިއުމަށް ބޭނުންކުރެވިދާނެ ތަކެތި އާ ބެހޭގޮތުންނެވެ. މިގޮތުން ސްޓާފް ޑިވެލޮޕްމެންޓް ޕްލޭނާއި، ސެކްޝަން މެނުއަލް އާއި އެކްޝަން ޕްލޭން ތައްޔާރުކުރާނެގޮތާއި އޭގައި ހިމަނާނެ ބައިތަކާ ބެހޭގޮތުން މިސާލާއެކު މަޢުލޫމާތް ހިއްސާކުރެއްވެވިއެވެ. މީގެ އިތުރުން ހިއުމަން ރިސޯސް މެނޭޖްމަންޓާއި ބެހޭގޮތުން 2018 ވަނައަހަރު ސައުތްކޮރިއާގެ މިނިސްޓްރީ އޮފް ޕާރސެނެލް މެނޭޖްމަންޓުން ނެރެފައިވާ އަތްމަތީފޮތެއް ބައިވެރިންނާއި ހިއްސާކުރެއްވެވިއެވެ.

އިއްޔެ ބޭއްވުނު ތަމްރީން ސެޝަންގައި މިމަހުގެތެރޭގައި ސިވިލް ސަރވިސްގެ ޅަދަރިމައިންނަށާއި ބަފައިންނަށް ދޭން ހަމަޖެއްސެވި އިނާޔަތާ ގުޅޭގޮތުންވެސް ބައިވެރިންނަށް މަޢުލޫމާތް ހިއްސާކުރެވުނެވެ.