އަންހެނުންނަށް ދިމާވާ ގައިނޮކޮލޮޖިކަލް ބައްޔެއްކަމުގައިވާ އޮންޑްމެޓްރޯސިސް އާ ގުޅޭގޮތުން ހޭލުންތެރިކަން އިތުރުކޮށް މިބަލި ތަހައްމަލުކުރަމުންދާ އަންހެން ސިވިލް ސަރވަންޓުން ވެސް އިތުރުވަމުން ރާއްޖޭގައި ދާތީ މިކަންކަމުގެ މައްޗަށް މަޢުލޫމާތު ދިނުމުގެ ގޮތުން މަސައްކަތްކުރުމަށް އަލަށް އުފެދުނު އެންޑޮމެޓްރޯސިސް އެސޯސިއޭޝަން އޮފް މޯލްޑިވިސް ގެ ފަރާތުން ކޮމިޝަނުގެ ރައީސް ޑރ. އަލީ ޝަމީމް އާއި މިއަދު ކޮމިޝަނުގައި ބައްދަލުކުރައްވައިފިއެވެ.

މި އެސޯސިއޭޝަންގެ ފަރާތުން މިބައްދަލު ކުރެއްވުމުގައި ބައިވެރިވެވަޑައިގަތީ އެ ޖަމްއިއްޔާގެ ރައީސާ ފާތިމަތް މިޒްނާ އާއި ޕްރިންސިޕަލް ސްޓެރެޓެޖިސްޓް އާމިނަތް ހުސެއިން ޝަރީފެވެ. މިބައްދަލުކުރެއްވުމުގައި 31 މާރިޗު 2019 ވަނަދުހުވަހުގެރޭ ހޮޓެލް މާގިރީގައި ބޭއްވުމަށް ހަމަޖެހިފައިވާ އެޖަމްއިއްޔާ ރަސްމީކޮށް އިފްތިތާޙްކުރެވޭ ޖަލްސާގައި ބައިވެރިވަޑައިގެންދެއްވުމަށް ކޮމިޝަނުގެ ރައީސަށް ދައުވަތް ދެއްވެވިއެވެ.

މި ޖަމްއިއްޔާއިން ހޭލުންތެރިކަން އިތުރު ކުރުމަށް ކޮމިޝަނުގެ ފަރާތުން ދެވެން އޮތް އެއްބާރުލުމާއި އެހީތެރިކަން ދެއްވާނެކަމަށާއި، ދިވެހި ސިވިލް ސަރވަންޓުންނަށް މިބައްޔާގުޅޭގޮތުން މަޢުލޫމާތް ލިބުމަކީ ވަރަށް މުހިންމު މަކެއްކަމުގައި މިބައްދަލުވުމުގައި ކޮމިޝަނުގެ ރައީސް ވިދާޅުވެފައިވެއެވެ.