ޔުނައިޓަޑް އަރަބި އެމަރޭޓްސް ގައި ސިވިލް ސަރވިސް ގެ މުވައްޒަފުންގެ ކަންކަން ބަލަހައްޓާ ގައުމީ އިދާރާ ކަމުގައިވާ ފެޑެރަލް އޮތޯރެޓީ ފޯ ހިއުމަން ރިސޯސަސް (އެފް އޭ އެޗް އާރް) އާއި ކޮމިޝަނާދެމެދު ގުޅުންބަދަހިކޮށް އެއްބަޔަކު އަނެއްބަޔަކާދެމެދު ތަޖްރިބާ ހިއްސާކުރުމާއި ހިންގުމުގެ ގާބިލުކަން އިތުރު ކުރެވިދާނެ ގޮތްތައް ދެނެގަތުމުގެގޮތުން މަޝްވަރާކުރެވިއްޖެއެވެ.

މި މަޝްވަރާކުރެވުނީ މިހާރު ޔޫއޭއީ އަށް ކޮމިޝަނުގެ ރައީސް ޑރ. އަލީ ޝަމީމް ކުރައްވަމުންގެންދަވާ ދަތުރުފުޅުތެރޭގައި އެފް އޭ އެޗް އާރު ގެ މަރުކަޒަށް ޒިޔާރަތްކުރައްވަވައި އެފަރާތުގެއިސް ބޭފުޅުންނާއެކު ބޭއްވުނު ބައްދަލުވުމެއްގައެވެ. މި މަޝްވަރާ ބައްދަލުވުމުގައި އެފް އޭ އެޗް އާރު ގެ ފަރާތުން ބައިވެރިވެވަޑައިގެންނެވީ އެތާގެ ޑިރެކްޓަރ ޖެނެރަލް ހިޒް އެކްސަލަންސީ ޑރ. އަބްދުލްރަހުމާން އަބްދުލް މަންނާން އަލް އަވަރު އާއި ސަޕޯޓް ސާރވިސާސް ސެކްޓަރގެ ޗީފް އެގްޒެކެޓިވް އޮފިސަރ މިސްޓަރ އިބްރާހިމް އަހްމަދު ފިކްރީ އާއި އަދި ހިއުމަން ރިސޯސާސް ޕޮލިސީ ސެކްޓަރ ގެ ޗީފް އެގްޒެކެޓިވް އޮފިސަރ މިސް އައިޝާ ޚަލީފާ އަލް ދުވައިދީއެވެ.

މި މަޝްވަރާ ބައްދަލުވުމުގައި މިހާރު ދެފަރާތު ދެމެދުގައި ސޮއިކުރެވިފައިވާ ފަހުމުނާމާގެ މުއްދަތު މިއަހަރުގެ މޭމަހަށް ހަމަވާތީ މި މުއްދަތު އިތުރުކުރުމަށް ދެފަރާތު ދެމެދުގައި އެކަމުގެ ލިއުން ބަދަލުކުރުމަށް އެއްބަސްވެވުނެވެ. އަދި އެފް އޭ އެޗް އާރު އިން ބާއްވާ ދިރާސީ އަދި އިލްމީ ކޮންފަރެންސްތަކަށް ސިވިލް ސަރވިސް ކޮމިޝަނުން ބައިވެރިވުމަށް ދައުވަތުދިނުމަށާއި، އެ އޮތޯރިޓީ އިން ނެރޭ ޢިލްމީ ދިރާސާތަކުގެ ކޮޕީ ކޮމިޝަނަށާއި ސިވިލް ސަރވިސް ޓްރެއިނިން އިންސްޓިޓިއުޓް އަށް ހިލޭ ފޮނުވާދޭ ގޮތަށް ހަމަޖެހުނެވެ. މީގެ އިތުރުން 2 މުއައްސަސާ ގުޅިގެން ދިރާސާތައް ކުރުމާއި، އަދި ދިވެހި ސިވިލް ސަރވަންޓުންނަށް ޔޫއޭއީގައި ތަމްރީން ލިބުމުގެ ފުރުސަތު ފަހިކޮށްދެވޭތޯ މަސައްކަތް ކުރައްވާނެކަމުގައި ޑިރެކްޓަރ ޖެނެރަލް ވިދާޅުވެފައިވެއެވެ.