ދިވެހި ސިވިލް ސަރވިސްގެ ބައެއްކަންކަން މުލަކަތޮޅު އަތޮޅު ކައުންސިލްގައި ކުރިއަށް ގެންދިއުމުގައި ދިމާވާ ގޮންޖެހުން ތައް ހައްލުކުރެވިދާނެގޮތްތަކާމެދު މިއަދު ކައުންސިލްގެ ފަރާތުން ސިވިލް ސަރވިސް ކޮމިޝަނަށް ޒިޔާރަތް ކުރައްވަވައި ކޮމިޝަނުގެ ރައީސް ޑރ. އަލީ ޝަމީމް އާއެކު މަޝްވަރާކުރައްވައިފިއެވެ.

މިއަދު ސިވިލް ސަރވިސް ކޮމިޝަނުގައި ބޭއްވި މި ބައްދަލުވުމުގައި، މުލަކަތޮޅު ކައުންސިލުގެ އިދާރާގެ މަސައްކަތްތައް ކުރިޔަށް ގެންދިއުމުގައި މުވައްޒަފުންނަށް ތަމްރީނުގެ ފުރުޞަތުތައް ހޯދައިދިނުމާއި އެ އިދާރާއަށް މުވައްޒަފުންގެ ދަތިކަންހުރިކަން ފާހަގަކޮށް އެކަންކަމާބެހޭ ގޮތުން ކޮމިޝަނާއެކު މަޝްވަރާކުރެވުނެވެ. އަދި ކޮމިޝަނުގެ ފަރާތުން މި މަޝްވަރާ ބައްދަލުވުމުގައި ކޮމިޝަނުގެ ފަރާތުން ކައުންސިލަށް ހުރިހާކަމެއްގައި ފުރިހަމަ އެއްބާރުލުމާއި އެހީތެރިކަން ލިބިގެންދާނެކަމުގެ ޔަގީންކަން ކޮމިޝަނުގެ ރައީސް މުލަކަތޮޅު އަތޮޅު  ކައުންސިލް ބޭފުޅުންނަށް އެރުވިއެވެ.

މި ބައްދަލުވުމުގައި މުލަކަތޮޅު އަތޮޅު ކައުންސިލްގެ ފަރާތުން ބައިވެރިވަޑައިގެންނެވީ މުލަކަތޮޅު ކައުންސިލްގެ ރައީސް އަލްފާޟިލް ޔޫސުފު ޞިދުޤީ އާއި ނައީބް ރައީސް އަލްފާޟިލް އަހްމަދު ހަސަން އާއި ކައުންސިލްގެ އެސިސްޓެންޓް ރިސާރޗް އޮފިސަރ އަލްފާޟިލް މުހައްމަދު އިކްރާމް އެވެ. ކައުންސިލްގެ ފަރާތުން ބައިވެރިވެވަޑައިގެންނެވީ ކޮމިޝަނުގެ ރައީސްގެ އިތުރުން ކޮމިޝަނުގެ ސެކްރެޓަރީ ޖެނެރަލް ޑރ. އިބްރާހިމް ޒުހުރީ އެވެ.