ދުބާއީގައި މިހާރު ކުރިއަށްދާ 7 ވަނަ ވާލްޑް ގަވަންމަންޓް ސަމިޓްގެ ތެރޭގައި ސިވިލް ސަރވިސް ކޮމިޝަނުގެ ވަފުދު ޔުނައިޓެޑް އަރަބި އެމަރޭޓްސް ގެ ޕްރައިމިނިސްޓަރ އޮފީހުގެ ޑިރެކްޓަރ ޖެނެރަލް މުޙައްމަދު ބިން ޓަލިއާ އާއިއެކު މަޝްވަރާކުރައްވައިފިއެވެ. މި މަޝްވަރާ ބައްދަލުވުމުގައި ވާހަކަދެކެވުނީ ޔޫއޭއީގައި ސަރުކާރާއި ސަރުކާރު ނޫން އޮފީސްތައް ވަޒަންކޮށް ހިންގުންތެރިކަމާއި ޚިދުމަތް ދިނުމުގައި ފެންވަރުހުރިނެތްގޮތާ ގުޅޭގޮތުންދެވޭ މިންގަނޑު ކަމުގައިވާ ސްޓާރ ރޭޓިންގ ދިނުމުގައި އަމަލު ކުރެވޭގޮތާއި އެކަންކުރުމަށް ކޮމިޝަނުގެ މުވައްޒަފުން ތަމްރީނުކޮށް މައުލޫމާތާއި، ތަޖުރިބާ ހިއްސާކުރުމާ ގުޅޭގޮތުންނެވެ. މިކަމުގައި ފުރިހަމަ އެއްބާރުލުމާއި އެހީތެރިކަން ޔޫއޭއީގެ ޕްރައިމިނިސްޓަރ އޮފީހުން ފޯރުކޮށްދެއްވަވާނެ ކަމުގައި ޑިރެކްޓަރ ޖެނެރަލް ވިދާޅުވިއެވެ. އަދި މިކަމާގުޅޭގޮތުން ފަހުމުނާމާއެއް އެކުލަވާލުމުގެ ކަންތައްކުރިއަށް ގެންދިއުމަށްވެސް މިއަދުގެ ބައްދަލުވުމުގައި މަޝްވަރާކުރެވުނެވެ.

މި މަޝްވަރާ ބައްދަލުވުމުގައި، ކޮމިޝަންގެ ފަރާތުން ބައިވެރިވެވަޑައިގަތީ ކޮމިޝަނުގެ ރައީސް ޑރ. އަލީ ޝަމީމާއި، މެންބަރު ފާތިމަތް އާމިރާ އާއި ސެކެޓްރީ ޖެނެރަލް ޑރ. އިބްރާހިމް ޒުހުރީ އެވެ.