ކޮމިޝަނުގެ ރައީސް ޑރ. ޢަލީ ޝަމީމު ގދ. ތިނަދޫގެ ސިވިލް ސަރވިސްގެ މުވައްޒަފުންނާ ބައްދަލުކުރައްވައިފިއެވެ. ގދ. އަތޮޅުގެ 3 ސްކޫލެއްގެ ދަޢުވަތަކަށް އެ އަތޮޅަށް ކުރެއްވި ދަތުރުފުޅުގައި 18 އޮގަސްޓް 2018ގައި ތިނަދޫގެ އެކި އިދާރާތަކުގެ ސިވިލް ސަރވިސްގެ މުވައްޒަފުންނާ ބައްދަލުކުރެއްވުމުގެ އިތުރުން "ހިންގުމުގެ މޮޅު ހުނަރު"ތަކާ ބެހޭގޮތުން 2 ގަޑިއިރުގެ ތަމްރީނު ޕްރޮގްރާމެއް ވެސް ކޮމިޝަނުގެ ރައީސް ހިންގެވިއެވެ. މި ބައްދަލުވުމާއި ތަމްރީނުގެ ތެރެއިން، ސިވިލް ސަރވިސްގެ ތަރައްޤީއަށް ކުރެވެމުންދާ މަސައްކަތްތަކުގެ މަޢުލޫމާތު ޑރ. ޢަލީ ޝަމީމު ހިއްސާކުރެއްވިއެވެ. އަދި ސިވިލް ސަރވިސްގެ އެކިކަންކަމާ ގުޅޭގޮތުން މި ބައްދަލުވުމުގެ ބައިވެރިން ކުރެއްވި ސުވާލުތަކަށް ވެސް ކޮމިޝަނުގެ ރައީސް ޖަވާބުދެއްވިއެވެ. ތިނަދޫ ކައުންސިލުން އިންތިޒާމު ކޮށްދެއްވި މި ތަމްރީނު ޕްރޮގްރާމުގެ ބައިވެރިންނަށް ސެޓްފިކެޓް ހަވާލުކޮށްދެއްވާފައި ވަނީ ވެސް ކޮމިޝަނުގެ ރައީސް ޑރ. ޢަލީ ޝަމީމެވެ. ކޮމިޝަނުގެ ރައީސް ކުރެއްވި  މި ދަތުރުފުޅުގައި ތިނަދޫ އަބޫބަކުރު ސްކޫލުގައި، “އަމިއްލަ ނަފުސު ތަރައްޤީކުރުމާ”ބެހޭ ގޮތުން ތިނަދޫގެ ޒުވާނުންނަށް ބޭއްވި ސެމިނާރެއްގައި ވެސް މަޢުލޫމާތުދެއްވާފައި ވެއެވެ.