01 އޮކްޓޯބަރ 2018
ވެރިކަން ބަދަލުވުމުގެ މަރުޙަލާއާބެހޭ ޤާނޫނުގައި ބަޔާންކޮށްފައިވާ ޑައިރެކްޓަރ ޖެނެރަލް އޮފް އޮފް ޓްރާންސިޝަންގެ މަޤާމަށް ހ. ސީވީޑް އަލްފާޟިލް އަޙުމަދު ލަޠީފު އައްޔަންކުރައްވައިފިއެވެ.
ޑައިރެކްޓަރ ޖެނެރަލް އޮފް ޓްރާންސިޝަންގެ މަޤާމު ހަވާލުކުރުމާއި އަދި ވަޒީފާގެ އެއްބަސްވުން އަހަވާލުކޮށްދެއްވުމަށް މިއަދު ހެނދުނު ކޮމިޝަނުގައި ބޭއްވި ރަސްމިއްޔާތެއްގައި މި ލިއުން ހަވާލުކޮށްދެއްވީ ކޮމިޝަނުގެ ރައީސް ޑރ. ޢަލީ ޝަމީމެވެ. މި ރަސްމިއްޔާތުގައި ކޮމިޝަނުގެ މެންބަރުންނާއި ސީނިއަރ ސްޓާފުންގެ އިތުރުން އެމްޑީޕީގެ ސެކްޓްރީ ޖެނެރަލް އަނަސް ޢަބުދުއްސައްތާރު ބައިވެރިވެ ވަޑައިގެންނެވިއެވެ.
ޤާނޫނު ނަމްބަރު 05/2010 (ވެރިކަން ބަދަލުވުމުގެ މަރުޙަލާއާބެހޭ ޤާނޫނު) އަކީ ވެރިކަން ބަދަލުވުމުގެ މަރުޙަލާގައި އަމަލުކުރަންޖެހޭ އުސޫލުތައް ބަޔާންކޮށްފައިވާ ޤާނޫނެވެ. މި ޤާނޫނުގައި ވާގޮތުން ޑިރެކްޓަރ ޖެނެރަލް އޮފް ޓްރާންސިޝަންގެ މަޤާމަށް އައްޔަންކުރެވޭ ފަރާތުގެ މަސްއޫލިއްޔަތުތަކުގެ ތެރޭގައި، ރައީސުލްޖުމްހޫރިއްޔާގެ މަޤާމަށް އިންތިޚާބު ކުރެވުނު ފަރާތުން ބޭނުންކުރުމަށް އެކަށީގެންވާ އޮފީހާއި އެ އޮފީހަށް ބޭނުންވާ އެންމެހައި ތަކެތި ހަމަޖައްސައިދިނުމާއި ރައީސުލްޖުމްހޫރިއްޔާއަށް ހޮވިފައިވާ ފަރާތަށް ސަލާމަތާ ރައްކާތެރިކަން ޤައުމީ ދިފާއީބާރު މެދުވެރިކޮށް ހަމަޖެއްސުމުގެ ކަންކަން ވިލަރެސްކުރުން ހިމެނެއެވެ.
ޑައިރެކްޓަރ ޖެނެރަލް އޮފް ޓްރާންސިޝަންގެ މަޤާމަށް އަލްފާޟިލް އަޙުމަދު ލަޠީފު އައްޔަންކޮށް މަޤާމުގެ ލިއުން ހަވާލުކުރުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުން ކޮމިޝަނުގެ ރައީސް ޑރ. ޢަލީ ޝަމީމު ވަނީ މިއީ ރާއްޖޭގެ ތާރީޚުގައި މި މަޤާމަށް ބޭފުޅަކު ފުރަތަމަ އައްޔަންކުރެވުނު ފަހަރުކަން ފާހަގަކުރައްވާފައެވެ. އަދި އެމަނިކުފާނުގެ މަސައްކަތުގައި ކޮމިޝަނުގެ ފުރިހަމަ އެއްބާރުލުން ލިބިވަޑައިގަންނަވާނެކަމަށް ވިދާޅުވިއެވެ. ކޮމިޝަނުގެ ރައީސްގެ ވާހަކަފުޅުގައި ކޮމިޝަނުގެ މެންބަރުންނާއި މުވައްޒަފުންނާއި އަދި މުޅި ސިވިލް ސަރވިސްގެ މުވައްޒަފުންގެ ފަރާތުން، ރާއްޖޭގެ އަލަށް ރައީސުލްޖުމްހޫރިއްޔާކަމަށް އިންތިޚާބުވެ ވަޑައިގެންނެވި އޮނަރަބުލް އިބްރާހިމް މުޙައްމަދު ޞޯލިޙާއި ނައިބުރައީސްކަމަށް އިންތިޚާބުވެ ވަޑައިގެންނެވި އޮނަރަބުލް ފައިސަލް ނަސީމަށް މަރުހަބާ ދެންނެވިއެވެ. އަދި އެ ދެބޭފުޅުންގެ ޒަޢާމަތުގައި ސިވިލް ސަރވިސްގެ މުވައްޒަފުންނާ ސިވިލްސަރވިސް ކޮމިޝަނުގެ މުވައްޒަފުންނަށް ފަހިކަމާއި އާރޯކަން ލިބިގެންދާނެކަމަށް އުންމީދުކުރައްވާކަމުގައި ވިދާޅިވިއެވެ.
މި ރަސްމިއްޔާތުގައި އަލްފާޟިލް ޢަޙުމަދު ލަޠީފު ދެއްކެވި ވާހަކަފުޅުގައި ސަރުކާރު ބަދަލުވުމުގެ މި މަރުހަލާގެ އެކިކަންކަމުގައި ކޮމިޝަނުގެ އެހީތެރިކަން ބޭނުންވާނެކަން ފާހަގަކުރައްވައި އެފަރާތުން އެދޭބައެއް ކަންކަން ހުށަހެޅުއްވިއެވެ. މިއަދު ބޭއްވި މި ރަސްމިއްޔާތުގައި ކޮމިޝަނުގެ މެންބަރުންގެ އިތުރުން ކޮމިޝަނުގެ ސީނިއަރ ސްޓާފުން ބައިވެރިވިއެވެ.
ފަހުގެ ޚަބަރުތައް
ސިވިލް ސަރވިސް އިދާރާތަކުން ފޯރުކޮށްދޭ ޚިދުމަތްތަކާމެދު އާންމު ރައްޔިތުންގެ ޚިޔާލު ހޯދުމަށް ފަރުމާކުރެވިފައިވާ އޮންލައިން ނިޒާމެއް އިދާރާތަކުގައި ތައާރަފުކުރުމަށް ކޮމިޝަނުން ނިންމައިފި
31 ޑިސެމްބަރ 2023
ދިވެހި ސިވިލް ސަރވިސްގެ މުވައްޒަފުންގެ ވަޒީފާއާބެހޭ މަސައްކަތްތައް އޮންލައިންކޮށް ކުރުމަށް ފަރުމާކުރެވުނު މޮޑިއުލް އިފްތިތާޙުކޮށްފި
07 ޑިސެމްބަރ 2023
ވެރިކަން ބަދަލުވުމުގެ މަރުޙަލާގެ އެންމެހާ ކަންތައްތައް އިންތިޒާމުކޮށް ބެލެހެއްޓުމަށް ޑިރެކްޓަރ ޖެނެރަލް އޮފް ޓްރާންސިޝަނުގެ މަޤާމަށް އަލްފާޟިލް ޢަބްދުއްރަހީމް އަބްދުﷲ، އަރާއިރު / ލ. ފޮނަދޫ، ހަމަޖައްސަވައިފި
05 އޮކްޓޯބަރ 2023
އިންޑިއާގައި ބޭއްވޭ ތަމްރީނު ޕްރޮގްރާމުގައި ބައިވެރިވުމަށް ސިވިލް ސަރވިސްގެ ވަފުދެއް އިންޑިއާއަށް ފުރައިފި
30 އޮކްޓޯބަރ 2022
ތަމްރީނާއި ތަޖްރިބާ ހާޞލުކުރުމަށް ދިވެހި ސިވިލް ސަރވިސްގެ ވަފުދެއް އިންޑިއާ އަށް
24 ޖުލައި 2022